‘पार्टीभित्रको निरंकुशता स्वीकार गर्न सकिँदैन’

254

विराटनगर । नेपाली कांग्रेसका केन्द्रीय सदस्य डा. शेखर कोइरालाले निरंकुशता अन्त्य गर्न स्थापित भएको पार्टीभित्रको निरंकुशता स्वीकार गर्न नसकिने बताएका छन् ।

शनिबार विराटनगरस्थित कोइराला निवासमा पार्टीमा नवप्रवेशीहरुलाई स्वागत गर्दै उनले भने, “नेपाली कांग्रेस निरंकुशता अन्त्य गरी लोकतन्त्र स्थापना गर्न बनेको पार्टी हो । त्यसैले पार्टीभित्रको निरंकुशता पनि कुनै हालतमा स्वीकार्य हुन सक्दैन ।”

उनले लोकतन्त्रको जगेर्ना नै कांग्रेसले गर्ने विश्वास नागरिकमा रहेको बताए । राजनीति राजधानीको रुपमा मोरङको साख फर्कनुपर्छ भन्ने आवश्यकता महसुस हुन थालेको उनले उल्लेख गरे । “अब मोरङको साख फर्कनेछ भन्ने मेरो विश्वास छ,” डा. कोइरालाले भने ।

त्यस अवसरमा संस्थागत विद्यालय महासंघ (प्याब्सन)का पूर्वमोरङ अध्यक्ष एवं केन्द्रीय सदस्य वासुदेव न्यौपाने, एन प्याब्सनका राजन छाराहाङ,  विवेकशील साझा पार्टीका नेता राजेश कर्ण, एन प्याब्सनका मोरङ कोषाध्यक्ष इन्द्रनारायण साहलगायत कांग्रेसमा प्रवेश गरेका थिए । नवप्रवेशीको तर्फबाट बोल्दै छाराहाङले अबको देशको राजनीतिक परिवेशलाई निकास कांग्रेसले मात्र दिन सक्ने बुझेरै पार्टीमा आएको सुनाए ।

नेपाली कांग्रेस विराटनगर महानगर समितिका सभापति तथा मेयर भीम पराजुलीले कांग्रेसको लोकतान्त्रिक सिद्धान्तलाई आत्मसात गर्दै देशका विद्यमान समस्यालाई निकास दिइनुपर्ने बताए । उनले भने, “अबको राजनीतिक निकास र देशको विकास कांग्रेसबाट मात्र सम्भव छ ।”

कांग्रेस १ नम्बर प्रदेश संसदीय दलका प्रमुख सचेतक केदार कार्कीले अहिले स्वार्थको राजनीतिक अधिक बढेको भन्दै सिद्धान्तको महत्व झन् चुलिएर गएको बताए ।