राष्ट्रपतिलाई कठघरामा उभ्याउन विपक्षी गठबन्धनका युवा संगठन एकजुट

209

काठमाडौं । बिपक्षी गठबन्धन आबद्ध ६ युवा संगठनले राष्ट्रपति र प्रधानमन्त्रीबाट असंवैधानिक काम भएको भन्दै उनीहरु पदमुक्त भइसकेपछि समेत कारवाही गर्ने वातावरण राजनीतिक तथा संवैधानिक हिसाबले निर्माण गर्न माग गरेका छन् ।

काँग्रेस निकट तरुण दल अध्यक्ष जितजंग बस्नेत, माओवादी निकट वाइसिएल अध्यक्ष रामप्रसाद सापकोटा ‘दीपशिखा’, एमालेको माधव नेपाल पक्षीय युवा संघका अध्यक्ष नरेश शाही, समाजवादी युवा संघका अध्यक्ष योगेन्द्रराय यादव, मसाल आबद्ध अखिल नेपाल युवा संघका अध्यक्ष अनिलकिशोर घिमिरे र विवेकशील साझा युवा संगठनका अध्यक्ष अब्दुस मियाँले शनिवार संयुक्त वक्तव्यमार्फत कारवाहीको माग गरेका हुन् ।

ती संगठनले संविधानको हत्या गर्ने राष्ट्रपति विद्यादेवी भण्डारीलाई यथाशीघ्र कानुनी कठघरामा उभ्याउन माग गरेका छन् । उनीहरुले राष्ट्रपतिलाई प्रधानमन्त्रीको रबरस्टाम्प बनेको आरोप लगाएका छन् ।

राष्ट्रपतिको आह्वानकै आधारमा तोकिएकै समयमा कांग्रेस सभापति शेरवहादुर देउवालाई प्रधानमन्त्रीमा प्रस्ताव गर्दै १४९ जना सांसदले दाबी पेश गर्दा समेत अश्वीकृत गर्नु असंवैधानिक कदम भन्दै विरोध गर्दै आएका छन् ।