भक्तपुरका काँग्रेस कार्यकर्तालाई पूजाअर्चना र दिप प्रज्वलनका लागि आह्वान

352

भक्तपुर, १९ जेठ २०७८

नेपाली काँग्रेसले भक्तपुरमा आफ्ना कार्यकर्तालाई मन्दिरमा गई पूजाअर्चना र दिप प्रज्वलनका लागि आह्वान गरेको छ । कोभिड १९ संक्रमणमा परी स्वास्थ्य लाभ गरिरहेका आफ्ना जिल्ला सभापति दुर्लभ थापा लगायत देशविदेशमा रही संक्रमणसंग जुधिरहेकाहरुको स्वास्थ्य लाभको कामनाका लागि यस्तो आह्वान गरिएको हो ।

नेपाली काँग्रेस भक्तपुरको निर्वाचन क्षेत्र नम्बर १ का सभापति जीवन खत्री र २ का सभापति नारायणभक्त खायमलीले सबै वडा कमिटीलाई सर्कुलर नै पठाएर पूजा अर्चना र दिप प्रज्वलनका लागि आह्वान गरेका युवा नेता राजु पुरीले जानकारी गराए । जेठ २२ गते शनिवार बिहान ७ बजे सम्बन्धित वडाको पायक पर्ने मन्दिरमा गई पूजा अर्चना र दिप प्रज्वलनका लागि अनुरोध गरिएको छ ।

नेपाली काँग्रेस भक्तपुरका उप सभापति हरिप्रसाद नेपाल, सचिव निशान ढुंगेल, प्रदेश सांसद कृष्णलाल भडेल लगायत जिल्ला समितिसंगको परामर्सपछि धार्मिक कार्यबाट कोरोनाबिरुद्धको शक्ति प्राप्त गर्न यस्तो कार्यक्रम आयोजना गरिएको बुझिएको छ । पार्टीका जिल्ला नेताहरु, स्थानीय जनप्रतिनिधिहरु लगायतको समन्वयमा उक्त कार्क्रम सम्पन्न गरिने बताइएको छ ।