देउवाले काँध फेर्ने बेला आयो, सभापतिमा मेरो उमेदवारी रहन्छ : गोपालमान श्रेष्ठ

300

काठमाडौं । नेपाली कांग्रेसका सभापति शेरबहादुर देउवाले सभापतिको उमेदवारका लागि प्रदेशका केन्द्रीय सदस्यहरुसँग गरेको छलफलमा सो समूहका प्रभावशाली नेता गोपालमान श्रेष्ठ भने उपस्थित भएनन् ।

आइतबार सभापति देउवाले गण्डकी प्रदेशका आफू निकट केन्द्रीय सदस्यहरुसँग छलफल गरेका थिए ।

श्रेष्ठ देउवालाई लामो समयदेखि नजिकबाट सहयोग पुर्‍याउने नेता हुन् ।

“उहाँले आफ्नो उमेदवारीकै विषयमा छलफल गर्न बैठक बोलाउनुभएको हो भन्ने मैले थाहा पाइहालेँ,” श्रेष्ठले बाह्रखरीसँग भने, “उहाँलाई मैले एकवर्ष पहिले नै भेटेर अब पार्टी सभापतिमा मैले उमेदवारी दिने हो । तपाईंले सहयोग गर्नुस् भनेको हुँ । अहिले उहाँले आफू नै सभापति हुनका लागि जसरी बैठक गर्नुभएको छ । त्यो जानेर म नगएको हुँ ।”

उनले अब १४ औँ महाधिवेशनमा आफू नै सभापतिको उमेदवार भएकाले तयारी पनि थालेको जानकारी दिए ।

“सहमति पनि मेरै नाममा हुन सक्छ,” श्रेष्ठले भने, “रियल उमेदवार नै म हो । शेरबहादुर देउवापछिको नेता मै हुँ । शेरबहादुर देउवालाई प्रधानमन्त्री बनाउने हो । सभापतिमा म आफैं अघि बढ्ने हो ।”

उनले देउवालाई तत्कालीन शाही आयोगले थुन्दा आफू नै आन्दोलनको नेतृत्व गरेर अघि बढेको र पार्टीमा पनि कार्यवाहक भएर राम्रोसँग काम गरेको बताउँदै अब देउवाले काँध फेर्ने बेला आएको बताए ।

“देउवालाई शाही आयोगले थुन्दा म नै कार्यवाहक भएर आन्दोलन हाकेँ,” उनले भने, “१२ बुँदेमा हस्ताक्षर गर्ने एक नेता हुँ । १२ औँ महाधिवेशनमा उहाँलाई सभापति बनाउन खोजेकै हो सकिएन, १३ औँमा बनाइयो । अब त उहाँले काँध फेर्ने बेला भयो नि ।”

नेता श्रेष्ठले एक वर्षअघि नै आफूले देउवालाई उमेदवारीबारे जानकारी गराएको र यसअघि पनि देउवाले आफूलाई नै नेतृत्व छाडिदिने आश्वासन दिएको बताए ।

“करिब एकवर्ष पहिले नै अभियान चलाएको हुँ,” उनले भने, “एकवर्ष पहिला पनि भनेको हुँ । अब मेरो पालो हो भनेर, अब उमेरले पनि दिँदैन । मैले उहाँलाई अब म उमेदवार हुँ भन्दा मैले तपाईंलाई नै हो छोड्ने भनेर भन्नुभएको हो । त्यो बाचा पनि अब उहाँले पूरा गर्नुपर्ने बेला आएको छ ।”