अर्घाखाँची । वैदिक सनातन धर्मसेवा समाज अर्घाखाँचीले यही साउन १४ गते सोमबारका दिन पाणिनीको मैदानमा शिवपूजन लगायत विभिन्न धार्मिक कार्यक्रमहरु गर्ने भएको छ । पाणिनी-५ मैदानमा अवस्थित मनोकामना भगवतीको मन्दिरमा उक्त कार्यक्रम गर्न लागेको वैदिक सनातन धर्मसेवा अर्घाखाँचीका अध्यक्ष चन्द्रमणि घिमिरेले बताउँनुभयाे ।
हिन्दू सनातन धर्मावलम्बीहरूको अत्यन्त महत्वपूर्ण एवं पवित्र साउनको सोमबार पारेर कार्यक्रम को तयारी गरेको छ। उक्त कार्यक्रममा ५१ हजार विल्वपत्र शिवजीलाई अर्पण गरिने आयोजकले बताएको छ । त्यसैगरी गाईको दुधद्वारा शिवलिङ्गमा अखण्ड दुग्धधारा समेत लगाइने तयारी भएको बताइएको छ । उक्त कार्यक्रममा आफै कर्ता बन्नका लागि भक्तजनहरुलाई कम्तिमा १,१०० विल्वपत्र र त्यत्ति नै संख्यामा ११ सुते बत्ती ल्याउन समेत अनुरोध गरिएको महासचिव अन्नतप्रसाद घिमिरेले बताउँनुभयाे ।
श्रावणको उक्त सोमबारलाई विशेष बनाउनका लागि गङ्गाको जल ल्याइ भगवान् शिवलाई अभिषेक गर्ने कार्यक्रम समेत तय गरिएको छ भने भजन कृतन पनि कार्यक्रमको मुख्य आकर्षक रहने जनाइएको छ । उक्त कार्यक्रममा सहभागी बन्नका लागि सम्पूर्ण सनातन धर्मावलम्बीहरुलाइ आग्रह गरिएको छ ।
