काठमाडौँ, २० पुस । बाबा एडभेन्चर टुर एण्ड ट्राभलले काठमाडौँ–सुनौली पर्यटक बससेवा सुरु गरेको छ । सन् २००९ बाट पर्यटक बसमार्फत आन्तरिक तथा बाह्य पर्यटकलाई सेवा प्रदान गर्दै आएको बाबा एडभेन्चरले अंग्रेजी नयाँवर्ष सन् २०२४ लाई लक्षित गरी नयाँ सोफासहितको पर्यटक बसमार्फत सेवा सुरु गरेको हो । उक्त बसले रात्रीकालिन सेवा प्रदान गर्नेछ ।
सो बस काठमाडौँको गोँगबुस्थित नयाँ बसपार्कबाट साँझ ७.३० बजे सुनौलीका लागि छुट्नेछ । उक्त कम्पनीले यसअघि काठमाडौँबाट मुलुकको प्रमुख पर्यटकीय गन्तव्यस्थल पोखरा र चितवनको सौराहमा सोफावाला बसमार्फत सेवा प्रदान गर्दै आएको थियो ।
बाबा एडभेन्चरका सञ्चालक प्रल्हाद लोहनीले भारतीय पर्यटकलाई लक्षित गरी काठमाडौँ–सुनौली पर्यटक बससेवा सुरु गरेको बताउनुभयो । उहाँले नेपालमा पर्यटक बोक्न धेरै बस भित्रिएपनि बाटोको दुरावस्थाका कारण व्यवसायीलाई समस्या भएको बताउनुभयो ।
