संस्कृति, पर्यटन तथा नागरिक उड्डयनमन्त्री बद्री पाण्डेले शृंखलाबद्ध रूपमा आफूविरुद्ध कुप्रचारमा उत्रिएको भन्दै सांसद राजेन्द्र बजगाईंविरुद्ध कांग्रेसमा उजुरी दिएका छन् ।
कांग्रेस सहमहामन्त्रीसमेत रहेका पर्यटनमन्त्री पाण्डेले शुक्रबार बजगाईंमाथि अनुशासनको कारबाही माग गर्दै पार्टीमा उजुरी दिएका हुन् । पर्यटनमन्त्री पाण्डेका तर्फबाट उनको सचिवालयले पार्टीको अनुशासन समिति र संसदीय दलमा बजगाईंविरुद्ध उजुरी दर्ता गराएको हो । उजुरीमा कांग्रेसका महासमिति सदस्य तथा गोरखा -१ बाट निर्वाचित प्रतिनिधिसभा सदस्य बजगाईंले आफू मन्त्री नियुक्त भएदेखि नै शृंखलाबद्ध रूपमा विभिन्न आरोप लगाउँदै सामाजिक सञ्जालमा कुप्रचार गर्दै आएको उल्लेख छ ।
‘कांग्रेसका निर्वाचित माननीय सांसदले पार्टीको आन्तरिक अनुशासन र मेरो व्यक्तिगत इमान र निष्ठामा धावा बोल्ने गरी भए/गरेका निराधार आरोपले मेरो व्यक्तिगत भावनामाथि मात्र गम्भीर चोट नपुगी पार्टीको विचार, सिद्धान्त र आदर्शमा समेत आँच पुगेको छ । लोकतन्त्र र विधिको शासनमा यसखाले अवाञ्छित क्रियाकलापलाई कानुनको दायरामा नल्याएसम्म अराजकताले प्रोत्साहन पाएर इमान र निष्ठाको उपहास हुनेछ,’ उजुरीमा भनिएको छ ।
बजगाईंले एक क्यासिनोलाई इजाजत दिँदा भ्रष्टाचार गरेको भन्दै सामाजिक सञ्जालमा स्टाटस लेखेका थिए । लगत्तै मन्त्री पाण्डेले आफूमाथि निराधार आरोप लागेकाले त्यसविरुद्ध कानुनी बाटो अपनाउने प्रतिक्रिया दिएपछि सांसद बजगाईंले पाण्डेविरुद्धका सबै स्टाटसहरू सामाजिक सञ्जालबाट हटाएका थिए । मन्त्री पाण्डेले सांसद बजगाईंको अमर्यादित, अवाञ्छित, अराजक तथा गैरकानुनी काममाथि अनुसन्धान गरी आवश्यक कारबाही गर्न पनि माग गरेका छन् ।
