बुटवल । नेपाली कांग्रेसका महामन्त्री गगनकुमार थापाले चुनाव जित्न मुद्दा बोकेर होइन काम गर्नुपर्ने बताएका छन् । बुटवलमा शुरु भएको प्रथम प्रदेश सम्मेलनको उद्घाटनमा बोल्दै पार्टीलाई सञ्चालन गर्न समीक्षा र संकल्प गर्दै गर्दा आमजनता र कार्यकर्ताहरुको भावनालाई बुझ्नुपर्ने बताए ।
केही दलहरुले मिसन–०८४ को नाममा सभा गर्दै आफूहरुले परिवर्तन ल्याउने भन्दै हिँडेकोले त्यो सभा र भाषणले कुनै परिवर्तन नल्याउने जनाउँदै २०८० देखि ०८४ सम्म नेपाली कांग्रेसले महत्त्वपूर्ण कामहरु गर्नुपर्ने उल्लेख गर्दै कांग्रेसलाई त्यो भन्दा अरु केही गर्न नपर्ने जनाए ।
हमासको बन्धकमा रहेका नेपाली युवा विपिन जोशीका बाआमालाई छोराको सकुशल उद्धार गरी ल्याउन कांग्रेस सम्मिलित सरकारले आभास दिलाउन सक्नुपर्ने बताउँदै उनले राजनीतिक दलको भूमिका निर्वाह गर्नुपर्ने जनाए ।
उनले पछिल्लो समय जनतामा चरम निराशा छाएको, आक्रोश र पीडा दलहरुकै कारणले भएको भन्दै कांग्रेसका सबै प्रतिनिधिलाई काम गरेर देखाउन आग्रह गरेका छन् ।
उनले नागरिक रिसले रन्थनिएको भन्दै देशमा अनेकौँ समस्याका खाडल रहेको भन्दै यो समस्यालाई हल गरेर देश र जनतालाई सहुलियत र सहजता ल्याउनु पर्नेमा जोड दिए ।
