घोराही । लुम्बिनी प्रदेशको उद्योग तथा यातायात व्यवस्था मन्त्रालयले आफ्नो प्रदेशभित्र सवारी नम्बर प्लेट विद्युतीय सवारी दर्ता प्रणाली (ईलेक्ट्रिकल भेहिकल रजिस्ट्रेसन सिस्टम, ईभीआरएस) प्रणाली तत्काल लागू गर्नको लागि मातहतलाई निर्देशन दिएको छ ।
उद्योग तथा यातायात व्यवस्थामन्त्री सरोज थापा (रोज राणा)ले आइतबार देउखुरीस्थित मन्त्रालयमा सचिव उमेश ढुङ्गानासहितका कर्मचारीहरूसँगको छलफलमा ‘ईभीआरएस’ प्रणाली के कति कार्यान्वयन भएको छ वा छैन सो विषयमा जानकारी लिएपछि ‘ईभीआरएस’ प्रणाली तत्काल कार्यान्वयन गर्न निर्देशन दिएका हुन् ।
मन्त्री थापाको निर्देशनपछि सचिव ढुङ्गानाले ‘ईभीआरएस’ प्रणालीका विषयमा मातहतका कार्यालयहरूसँग हालसम्मको प्रगति विवरण माग गरेका छन् । सचिव ढुङ्गानाले मातहतका कार्यालयहरूलाई उक्त प्रणाली लागू गर्न कुनै बाँकी कार्य भएमा तत्काल सम्पन्न गरी लागू गर्नेगरी मातहतका निकायलाई निर्देशन दिएका छन् ।
ईभीआरएस प्रणाली लागू भएपछि लुम्बिनी प्रदेशमा दर्ता हुने सवारी साधनहरू विद्युतीय माध्यमबाट लिपिबद्ध हुनेछन् । जसका कारण सवारीधनीले कर तथा नवीकरण जस्ता सेवाहरू अनलाइनमार्फत उपयोग गर्न पाउने हुँदा कार्यालयमा भिडभाड कम हुनेछ । बिचौलियाहरूको पनि प्रभाव न्यून हुन जाने र समग्र यातायात प्रशासनमा सुशासन कायम हुनेमा मन्त्रालयले अपेक्षा गरेको जनाएको छ ।
यसअघि, मन्त्री थापाले सवारी चालक अनुमतिपत्र लिने क्रममा सवारी साधन स्वयच्छिक रुपमा प्रयोग गर्ने निणर्य कार्यान्वयन गरेका थिए ।
