सुर्खेत । नेपाल ज्योतिष परिषद् जिल्ला कार्य समिति सुर्खेतको मुखपत्र ज्योतिर्गण लोकार्पण भएको छ । वीरेन्द्रनगर नगरपालिकाका प्रमुख प्रशासकिय अधिकृत कृष्णप्रसाद जैसीले एक औपचारिक कार्यक्रमका बीच ज्योतिर्गणको लोकार्पण गर्नुभएको हो । उहाँले परिषद्को सुर्खेत जिल्ला कार्यसमितिले पहिलो पटक ज्योतिषीय क्षेत्रका लेख रचनाहरु समावेश गरी प्रकाशनमा ल्याएको ज्योतिर्गणले समग्र ज्योतिषीय क्षेत्रको उन्नयनका लागि कोशेढुङ्गा सावित हुने विश्वास व्यक्त गर्नुभयो ।
नेपाल ज्योतिष परिषद्का आजीवन सदस्य समेत रहेका जैशीले वैज्ञानिक विद्या भएकाले यसको संरक्षण र सम्वर्द्धन गर्न आवश्यक भएको बताउँदै उहाँले भन्नुभयो ’प्रत्यक्ष शास्त्रको रुपमा रहेको विद्या भएकाले पनि यो अकाट्य छ । पछिल्लो समयमा राम्रो अध्ययन विना नै ज्योतिष भएको बताउनेहरुले यसलाई गलत ढंगबाट प्रयोग गरेकाले पनि यस प्रतिको विश्वासमा कमी आउन थालेको हो कि भन्ने भान भएको छ तर चन्द्र र सूर्य जत्तिकै यो सत्य भएकाले यसलाई कसैले डगमगाउन सक्दैनन् ।’
नेपाल ज्योतिष परिषद् सुर्खेतको मुखपत्रको रुपमा प्रकाशित भएको ज्योतिर्गणको पं. हरिप्रसाद सापकोटाले समीक्षा गर्नुभएको थियो । कार्यक्रममा कथाकार उमालाल आचार्य, अधिवक्ता दुर्गाप्रसाद सापकोटा, मध्यपश्चिमाञ्चल गजल मञ्चका अध्यक्ष धिरेन अनुपम, गीता पौडेल, ब्राह्मण समाज नेपालका केन्द्रिय उपाध्यक्ष हरिप्रसाद उपाध्याय र नेपाल ज्योतिष परिषद् कर्णाली प्रदेशका महासचिव ज्यो. विष्णु प्रसाद अधिकारीले शुभकामना मन्तव्य दिनु भएको थियो ।
ज्योतिर्गणमा हाम्रा आफ्नै कुरादेखि, राशि तत्व बोध, ज्योतिषशास्त्रमा फलितको महत्व, जातक जन्मफल, विश्वगुरुको दर्शन र कर्णालीमा ज्योतिष, वेद र ज्योतिष, कलशस्य आर्शिवचन, ज्योतिषमा नवग्रहको महत्व, प्रभाव र मान्यता, सूर्य सिद्धान्त, कोपरनिकस र केप्लर, ज्योतिष अनुसन्धान केन्द्रको निर्माण आवश्यक छ अन्तरवार्ता, शुक्रास्त र यसले पार्ने प्रभाव, ज्योतिषशास्त्र अनुसार अशुभ ग्रहको पूर्वसंकेतहरु, भयात, भभोग र चन्द्रस्पष्ट ज्ञान, हस्तरेखा आधारभूत ज्ञान, ज्योतिषशास्त्रमा यन्त्र, मन्त्र र तन्त्र, सत्मार्गको महत्व, सक्षम छन् नारी, शिक्षाको विकासमा अस्तित्व व्यवस्थापन शास्त्रको उपयोगिता, ज्योतिषशास्त्रको छोटो परिचय, तन्त्र विद्याको महिमा, समय, गणना र ज्योतिष, वैदिक ज्योतिषको सामान्य परिचय, स्नान, ग्रहशान्ति यथार्थ र भ्रम, संचार क्षेत्रमा ज्योतिष परिषद् सुर्खेतका गतिविधिलगायतका विषयहरु समेटिएका छन् ।
कार्यक्रममा नेपाल ज्योतिष परिषद् कर्णाली प्रदेशका वरिष्ठ उपाध्यक्ष ढाकाराम अधिकारी, कोषाध्यक्ष रामशंकर उपाध्याय, ब्राह्मण समाज नेपालका केन्द्रीय सदस्य दुर्गाकुमारी अधिकारी तथा सुर्खेतका अध्यक्ष तिलकराम चालिसे, , गंगाप्रसाद ढुंगानालगायतको उपस्थिति रहेको थियो । वार्षिक रुपमा प्रकाशन गर्ने लक्ष्य राखिएकाले आगामी दिनमा यसलाई अझ परिस्कृत गर्दै अगाडि बढ्ने परिषद् सुर्खेतले बताएको छ । यसै कार्यक्रममा सुर्खेत जिल्लाबाट आजीवन सदस्यता प्राप्त ज्योतिषहरुलाई केन्द्रीय सदस्य ज्यो.विकास पौडेलले प्रमाण पत्र वितरण गर्नुभएको थियो ।
साथै ज्योतिर्गण प्रकाशनमा सहयोग गर्नुहुने लेखक, प्रकाशन समिति, सम्पादक मण्डल र विशेष सहयोगीहरुलाई अध्यक्ष यामप्रसाद अधिकारीले धन्यवाद ज्ञापन गर्नुभयो ।
कार्यक्रम अध्यक्ष यामप्रसाद अधिकारीको अध्यक्षता, ज्यो.शोभाखर अधिकारीको स्वागत मन्तव्य एवम् सचिव खगेन्द्र प्रसाद अधिकारीको सञ्चालनमा सम्पन्न भएको थियो ।
