काठमाडौं । प्रधानमन्त्री पुष्पकमल दाहाल प्रचण्डले भोली शुक्रबार विश्वासको मत लिदैँ छन् । काँग्रेस, एमाले, राप्रपा सहितका दलहरुले विश्वासको मत नदिने भएसँगै प्रधानमन्त्री प्रचण्डले विश्वासको मत पाउँने सम्भावना छैन् । विश्वासको मत नपाएपछि प्रधानमन्त्री प्रचण्ड पदमुक्त हुनेछन् । पदमुक्त भएसँगै सत्ता साझेदारी गर्न लागेका संसदका दुई ठूला दल नेपाली कांग्रेस र नेकपा एमालेले शुक्रवारै नयाँ सरकार गठनका लागि राष्ट्रपतिसमक्ष जानकारी दिने तयारी गरेका छन् ।
संसदको प्रक्रिया सकिए लगत्तै एमाले संसदीय दलका नेता केपी शर्मा ओली काँग्रेसको समर्थन सहित दुई तिहाइ भन्दा बढी सांसदहरूको समर्थन रहेको जानकारी राष्ट्रपतिलाई गराउने तयारी छ । काँग्रेस, एमाले बाहेक अन्य साना दलका सांसहरुको पनि हस्ताक्षर संकलन गरिएको छ ।
नयाँ सरकार गठनको प्रक्रियालाई जटिल बनाउन प्रधानमन्त्रीले विश्वासको मत लिन लागेको बेला कांग्रेस र एमालेले सांसदहरूको हस्ताक्षर समेत गराएर धारा ७६ को उपधारा २ बमोजिम ओलीलाई प्रधानमन्त्री बनाउन राष्ट्रपतिसमक्ष आग्रह गर्ने तयारी भएको हो ।
माओवादी केन्द्रले प्रधानमन्त्रीले विश्वासको मत नपाएपछि धारा ७६ को उपधारा ३ को सरकार गठन हुने र देउवा प्रधानमन्त्री बन्ने जिकिर माओवादी सांसदहरुले गरिरहेका छन् । ।
कांग्रेस र एमालेले दुई तिहाइ सांसदको हस्ताक्षर र दुईभन्दा बढी दलहरूको समर्थन ओलीलाई रहेको लिखित जानकारी राष््टरपतिलाई गराउन लागेको एक नेताले बताए ।
