अर्घाखाँची : अर्घाखाँचीमा मदिरा सेवन गरी मामा भान्जाबीच विवाद हुँदा मामाले भान्जाको हत्या गरेका छन् ।
हत्या आरोपमा अर्घाखाँचीको शितगंगा नगरपालिका वडा नम्बर ६ साना ढुंग्रेका ५३ वर्षीय झन्द्र बहादुर गाहालाई प्रहरीले पक्राउ गरी अनुसन्धान शुरु गरेको छ । उनले आफ्नै भान्जा तिलक रेश्मीको हत्या गरेको पाइएको जिल्ला प्रहरी कार्यालय अर्घाखाँचीले पत्रकार सम्मेलन गरी जानकारी गराएको छ ।
जिल्ला प्रहरी प्रमुख डीएसपी चक्र मल्लले जानकारी दिए । मंगलबार बिहान सानाढुंग्रेस्थित भिरपाखोमा ३५ वर्षीय रेश्मी मृत अवस्थामा भेटिएको पत्रकार सम्मेलनमा डिएसपी मल्लले बताए । मृत फेला परेको भन्ने जानकारी पाउन साथ ईलाका प्रहरी कार्यालय ठाडाको टोली घटनास्थलमा पुगेको थियो । आरोपित गाहालाई पक्राउ गरी अनुसन्धान शुरु गरिएको जिल्ला प्रहरी कार्यालयका सूचना अधिकारी बिष्णु प्रसाद पौडेलले जानकारी दिए ।
अनुसन्धानका क्रममा उनकै मामा गाहाले भान्जा तिलक रेष्मीको हत्या गरेको खुलेपछि पक्राउ गरिएको प्रहरी नायब उपरीक्षक मल्लले पत्रकार सम्मेलनमा पुष्टि गरे । उनीहरु २६ गते साँझ ६ बजेतिरसँगै बसेर मदिरा सेवन गरेका थिए । मदिरा खाने क्रममा विवाद भएपछि गाहाले भान्जा रेश्मीलाई गाली गलौज गरेको प्रहरीको प्रारम्भिक अनुसन्धानमा खुलेको इलाका प्रहरी कार्यालय ठाडाका प्रहरी निरीक्षक रविन्द्र चन्दले जानकारी दिए ।
साढे ६ बजेतिर रेश्मी मामा गाहाकै घरमा गएर मलाई किन गाली गरेको भन्दै विवाद गर्न पुगेको प्रहरीको अनुसन्धानमा खुलेको छ । त्यसपछि सोही राति ११ बजेतिर मामा गाहाले भान्जा रेश्मीको हत्या गरेको अनुसन्धानमा खुलेको प्रहरीले जनाएको छ ।
राति अबेरसम्म रेश्मी घर नआएपछि परिवारका सदस्यले साथीकोमा गए होलान् भन्दै खोजी नगरेको पारिवारिक श्रोतले जनाएको छ ।
हत्यापछि मनोजबहादुर गाहाको खर्यान भिरपाखामा लगेर मामाले शव फालेको खुलेको छ । रेश्मीलाई ढुंगा प्रहार गरेर हत्या गरेको प्रहरीले दाबी गरेको छ । पक्राउ परेका गाहालाई कर्तव्य ज्यानको कसुरमा जिल्ला अदालत अर्घाखाँचीबाट म्याद थप गरी अनुसन्धान अघि बढाएको छ ।
